प्रतिक्रियावादीसँग अन्तिम लडाईं लड्न बाँकी नै छ - अध्यक्ष प्रचण्ड
काठमाडौं , श्रावण-१८ । नेकपा(माओवादी केन्द्र)का अध्यक्ष पुष्पकमल दाहाल प्रचण्डले पार्टीलाई विभाजन गर्न प्रतिक्रियावादीहरूले अनेकौँ षड्यन्त्र गरिरहेको भन्दै प्रतिक्रियावादीसँग अन्तिम लडाईं लड्न बाँकी नै रहेको बताउनुभएको छ । आइतबार पार्टी केन्द्रीय कार्यालय पेरिसडाँडामा आयोजित २३ औँ बोत्ले स्मृति दिवस कार्यक्रममा अध्यक्ष प्रचण्डले प्रतिक्रियावादीहरुले षडयन्त्र गरिरहेको बताउँदै एकताबद्ध भएर प्रतिरोध गर्ने बताउनुभयो । आफू जिवित रहनु परेको कारण अर्को क्रान्ति गर्नको लागि भएको उहाँको भनाई छ ।
‘प्रतिक्रियावादी अपराधीहरूले हाम्रो पार्टीलाई विभाजन गर्न अनेक षड्यन्त्र गर्ने, जालझेल गर्ने, लगानी गर्ने तमाम काम गर्दै आएका छन् । जतिबेला हामी शान्ति सम्झौतामा आयौँ, त्यतिबेलादेखि नै षड्यन्त्र, छलछाम जारी नै छ’, उनले भने-‘सबै क्रान्तिकारी कम्युनिस्टहरूबिच एकता गर्ने प्रयास गरेका छौँ । तर प्रतिक्रियावादीले ज्यान छोडेर लागेका छन् भन्ने कुरा पनि हामी सबैले बुझ्नुपर्ने हुन्छ । अन्तिम यो मुठभेडमा प्रतिक्रियावादीले जित्ने हो कि क्रान्तिकारी अग्रगामीले जित्ने फैसला अहिले नै भइहालेको छैन । वामपन्थी क्रान्तिकारीलाई एकताबद्ध पारेर प्रतिक्रियावादीलाई प्रतिवाद गर्ने हामीले कोसिस गरेका छौँ ।’
कार्यक्रममा अध्यक्ष प्रचण्डले बोत्ले हत्याकाण्डलाई राष्ट्रिय र अन्तर्राष्ट्रिय स्तरमा पुर्याउन केही कमी महसुस गरेको उललेख गर्नुभयो । "जिल्लालाई मात्र होइन, पार्टी केन्द्रकै कमी हो यो भन्न चाहन्छु। त्यो यति ठूलो र विभत्स हत्याकाण्ड र त्यसका महान सहिदहरू, घाइते अपांगहरू, त्यसमै सहभागी भई जीवित फर्किन सफल कमरेडहरूको व्यथा र कथालाई हामीले जुन स्तरमा स्थापित गर्नुपर्थ्यो, त्यो गर्न सकिएन। र आज तपाईंहरूले पार्टी हेडक्वार्टरमै व्यवस्थित रूपमा यो कार्यक्रम राखेर सहिदहरूलाई श्रद्धाञ्जली व्यक्त गर्नुभयो, सहिद परिवारहरूलाई सम्मान गर्नुभयो, घाइते अपांगहरूलाई पनि सम्मान गर्नुभयो, यो विशेष छ ।"
बोत्लेमा भएको तत्कालिन घटनासम्बन्धी वृत्तचित्रको समेत प्रदर्शन गरिएको थियो । उक्त बृत्तचित्रमा १५ जना योद्धाहरूलाई ‘समर्पित’ गरिएको जनयुद्धको इतिहास झल्काउने दृष्यहरू प्रस्तुत गरिएको थियो ।
कार्यक्रममा अध्यक्ष प्रचण्डले दोलखाको बोत्ले हत्याकाण्डलाई आगामी दिनमा देशभरका सामूहिक हत्याकाण्डसँगै राष्ट्रिय तथा अन्तर्राष्ट्रिय रूपमा स्थापित गर्ने प्रतिबद्धता व्यक्त गर्नुभयो। 
