प्रधानमन्त्री प्रचण्डद्वारा ४०० केभीको तेस्रो ठूलो हेटौंडा सबस्टेसन उद्घाटन
<p>हेटौंडा, ३२ जेठ : प्रधानमन्त्री पुष्पकमल दाहाल ‘प्रचण्ड’ले ४०० केभीको तेस्रो ठूलो हेटौंडा सबस्टेसन उद्घाटन गर्नुभएको छ । नेपाल विद्युत प्राधिकरणले आज यहाँ आयोजना गरेको एक कार्यक्रममा प्रधानमन्त्रीले मकवानपुरको हेटौंडा उपमहानगरपालिका–११ थानाभर्‍याङमा ४०० केभी निर्मित सो सबस्टेसन उद्घाटन गर्नुभएको हो ।</p>
<p>ग्याँस इन्सुलेटेड प्रणाली (जिआइएस) प्रविधिमा आधारित स्वचालित नेपालको तेस्रो ठूलो ४०० केभी हेटौंडा सबस्टेसन निर्माण सम्पन्न गरी गत शुक्रबारदेखि सञ्चालन (चार्ज)मा ल्याइएको छ । यसैगरी, नेपाल–भारत विद्युत् प्रसारण तथा व्यापार आयोजनाबाट थानाभर्‍याङमानै २२० र १३२/११ केभी क्षमताका सबस्टेसन निर्माण सम्पन्न गरी गत शुक्रबारदेखि नै चार्ज गरिएको छ । </p>
<p>मुलुकभित्रको पूर्व–पश्चिम विद्युत आपूर्तिलाई भर पर्दो तथा गुणस्तरीय बनाउन र भारतसँगको विद्युत् व्यापारका लागि निर्माण गरिएको जिआइएस प्रविधि युक्त स्वचालित ढल्केबर मुलुककै पहिलो, इनरुवा दोस्रो र हेटौंडा तेस्रो ठूलो सबस्टेसन हो । </p>
<p>हेटौंडा सबस्टेसनको निर्माण सम्पन्न भएसँगै करिब ४ हजार मेगावाट विद्युत प्रवाह गर्न सक्ने पूर्वाधार संरचना तयार भएको छ । हेटौंडा–ढल्केबर–इनरुवा ४०० केभी प्रसारण लाइन आयोजना निर्माण सम्पन्न भएपछि ढल्केबरबाट पूर्व–पश्चिम ४ हजार मेगावाट विद्युत् प्रवाह गर्न सकिने हुँदा आन्तरिक रुपमा विद्युत् आपूर्ति थप सुदृढ हुने र भारतसँगको विद्युत् व्यापार थप विस्तार हुनेछ । </p>
<p>अमेरिकी सहायता परियोजना मिलेनियम च्यालेञ्ज कर्पोरेसन (एमसीसी)बाट नुवाकोटको रातमाटेबाट निर्माण हुने ४०० केभीको डबल सर्किट प्रसारण लाइन हेटौंडा सबस्टेसनमा ल्याएर जोडिनेछ । यसका लागि हेटौंडा सबस्टेसनमा आवश्यक पूर्वाधार संरचना निर्माण गरिसकिएको छ ।</p>
<p>राष्ट्रिय विद्युत् विकास दशक कार्यक्रमअन्तर्गत सरकार र प्राधिकरणको संयुक्त लगानीमा हेटौंडा, ढल्केबर इनरुवा ४०० केभी सबस्टेसन विस्तार आयोजना सुरु गरिएको थियो । आयोजनाअन्तर्गतका तीन वटै सबस्टेसन निर्माण सम्पन्न भएका छन् । </p>
<p>हेटौंडा ४०० केभी सबस्टेसन निर्माणका लागि डिसेम्बर २०१८ ठेक्का सम्झौता गएको थियो । सरकार तथा प्राधिकरणको लगानी र विश्व बैँकको सहुलियतपूर्ण ऋणमा नेपाल भारत विद्युत प्रसारण तथा व्यापार आयोजनाबाट निर्माण गरिएको २२०/१३२/११ केभी हेटौंडा सबस्टेसन निर्माणका लागि डिसेम्बर २०१८मा ठेक्का सम्झौता भएको थियो । ४००, २२० र १३२ केभी हेटौंडा सबस्टेसनको अनुमानित लागत तीन अर्ब रुपैयाँ रहेको छ । </p>
<p><img src="https://cdn.cpnmc.one/media/uploads/2024/06/14/f6e3c30a-8a4d-4fe5-8d0a-647f3516ab6d.jpg" style="height:2436px; width:4160px" /><img src="https://cdn.cpnmc.one/media/uploads/2024/06/14/df0bda36-1601-4b24-a934-1a8a74a599b9.jpg" style="height:2638px; width:4160px" /><img src="https://cdn.cpnmc.one/media/uploads/2024/06/14/b9c447b9-887d-4df9-abd4-1b81bfc01dc5.jpg" style="height:2598px; width:4160px" /><img src="https://cdn.cpnmc.one/media/uploads/2024/06/14/b6dd90eb-5cb5-4547-a762-b3090bf9006f.jpg" style="height:2672px; width:4160px" /><img src="https://cdn.cpnmc.one/media/uploads/2024/06/14/839b68c4-9b92-48e8-94bb-8ce2db3fcee3.jpg" style="height:2634px; width:4160px" /><img src="https://cdn.cpnmc.one/media/uploads/2024/06/14/230d0a51-932b-4d6f-b74a-f11b18ac66fc.jpg" style="height:2842px; width:4160px" /><img src="https://cdn.cpnmc.one/media/uploads/2024/06/14/1a1b6d10-b3f6-4544-8d65-509f1311922f.jpg" style="height:2580px; width:4160px" /></p>
